 |
| 喺恒生銀行（011）工作17年嘅梁永祥，雖然兩年前轉去新鴻基金融做CEO，但依然心繫銀行業。唔講唔知，金管局計劃明年下半年推出嘅電子支票，正係佢嘅構思。 梁永祥噚日出席一個電子金融研討會，憶述四年前佢仲係恒生銀行做零售銀行阿頭嗰陣，有位朋友問佢，有乜方法可以廣泛應用電子證書，咁啱佢諗緊點樣幫銀行慳錢，於是靈機一觸，諗到如果可以大量取代紙質支票，銀行每日就慳廿萬元。 佢後來透過呢位朋友向金管局提出建議，最終被局方接納，經金管局一輪研究，預計明年下半年推出。市民改簽電子支票，透過電郵送畀對方入賬，前後工夫由依家至少兩個工作日，縮短至數分鐘，日後仲可以應用喺手機程式。同場嘅消委會副主席梁光漢封梁永祥為「電子支票之父」。 其實梁永祥之前已經因為首創信用卡cash dollar積分，獲得「卡王」美譽。 |